അലുവ: ആലുവ നഗരസഭാ തെരഞ്ഞെടുപ്പില് ആലുവയിലെ മൂന്ന് പ്രാദേശിക വാര്ത്താ ലേഖകരും രംഗത്ത്. കഴിഞ്ഞ തവണ മത്സരിച്ച നഗരസഭാ മുന് സ്ഥിരംസമിതി അധ്യക്ഷൻ ജെറോം മൈക്കിള്, ബിജെപി മുനിസിപ്പല് കമ്മിറ്റി പ്രസിഡന്റ് ആര്. പത്മകുമാര് എന്നിവരെ കൂടാതെ മുന് കോണ്ഗ്രസ് ന്യൂനപക്ഷ സെല് ജില്ലാ സെക്രട്ടറി സാബു പരിയാരത്തും ഇത്തവണ മത്സരരംഗത്തുണ്ട്. എല്ലാവരും കേരള ജേര്ണലിസ്റ്റ്സ് യൂണിയന് ഭാരവാഹികളുമാണ്.
കടത്തുകടവ് എട്ടാം വാര്ഡില് കോണ്ഗ്രസ് റിബല് സ്ഥാനാര്ഥിയായ സാബു പരിയാരത്തിനെതിരെയാണ് ബിജെപി സ്ഥാനാര്ഥിയായ പത്മകുമാര് മത്സരിക്കുന്നത്. സീറ്റ് ലഭിക്കാത്തതിനെ തുടര്ന്നാണ് കോണ്ഗ്രസ് പാര്ട്ടി ചുമതല രാജിവച്ച് സാബു സ്ഥാനാര്ഥിയായത്. വയലിനിസ്റ്റ് കൂടിയായ പത്മകുമാര് ജന്മഭൂമി ലേഖകനും, സാബു പരിയാരത്ത് സിറാജ് ലേഖകനുമാണ്. മണപ്പുറം അഞ്ചാം വാര്ഡിലാണ് യുഡിഎഫ് സ്ഥാനാര്ഥി ജെറോം മൈക്കിള് മത്സരിക്കുന്നത്. നിലവില് കോണ്ഗ്രസ് ബ്ലോക്ക് എക്സിക്യൂട്ടീവ് അംഗമാണ്.