ആലുവ:എടത്തല — സംസ്ഥാനത്ത് അരി, പലവ്യഞ്ജനം തുടങ്ങിയ നിത്യോപയോഗ സാധനങ്ങളുടെ വില കുതിച്ചുയരുന്നത് കുടുംബങ്ങളുടെ ബജറ്റിന് തിരിച്ചടിയാകുന്നു. ഒരു മാസത്തിനിടെ മൊത്തവിപണിയിൽ തുവരപ്പരിപ്പിന് കിലോയ്ക്ക് 20 രൂപയും പൊന്നി അരിക്ക് 14 രൂപയും വർധിച്ചു. കടല, ഉഴുന്ന്, വൻപയർ, ചെറുപയർ, പഞ്ചസാര തുടങ്ങിയവയുടെ വിലയും ഉയരുകയാണ്.
പശ്ചിമേഷ്യൻ സംഘർഷത്തിന്റെ പ്രത്യാഘാതങ്ങൾക്കു പിന്നാലെ നിത്യോപയോഗ സാധനങ്ങളുടെ വിലവർധനയും സാധാരണക്കാർക്ക് തിരിച്ചടിയായിട്ടുണ്ട്. മഹാരാഷ്ട്ര, ആന്ധ്രപ്രദേശ്, കർണാടക തുടങ്ങിയ ഉൽപാദക സംസ്ഥാനങ്ങളിലെ കാർഷിക മേഖലയെ എൽനിനോയും കാലാവസ്ഥാ വ്യതിയാനങ്ങളും ബാധിച്ചതും വിലക്കയറ്റത്തിന് കാരണമായി ചൂണ്ടിക്കാണിക്കപ്പെടുന്നു.
വടക്കൻ കേരളത്തിലെ പ്രധാന മൊത്തവിതരണ കേന്ദ്രമായ കോഴിക്കോട്ടെ വലിയങ്ങാടിയിലെ വിലനിലവാരമനുസരിച്ച് പൊന്നി അരിയുടെ വില കിലോയ്ക്ക് 73 രൂപയായി ഉയർന്നു. ഓണക്കാലത്ത് ഇത് 58 രൂപയായിരുന്നു. കുറുവ അരിയുടെ വിവിധ ഇനങ്ങൾക്കും ഓണത്തിനുശേഷം കിലോയ്ക്ക് മൂന്ന് രൂപ വീതം വർധിച്ചു.
ബിരിയാണി തയ്യാറാക്കാൻ ഉപയോഗിക്കുന്ന കൈമ അരിയുടെ വിലയും ഉയർന്ന നിലയിലാണ്. കഴിഞ്ഞ ജൂലൈ മുതൽ വിലയിൽ വർധനയുണ്ടായ കൈമ അരിക്ക് ഇടക്കാലത്ത് നേരിയ കുറവുണ്ടായെങ്കിലും ഇപ്പോൾ കിലോയ്ക്ക് 180 രൂപയിലെത്തി. കോല അരിക്കും വില വർധിച്ചിട്ടുണ്ട്.
പലവ്യഞ്ജനങ്ങളുടെ വിലയിലും കാര്യമായ വർധനയാണുണ്ടായത്. തുവരപ്പരിപ്പിന് കിലോയ്ക്ക് 20 രൂപയും വൻപയറിന് 14 രൂപയും കടലയ്ക്ക് 10 രൂപയും ഉഴുന്നിന് എട്ട് രൂപയുമാണ് വർധിച്ചത്. ചെറുപയർ, പഞ്ചസാര എന്നിവയുടെ വിലയും ഉയരുന്ന പ്രവണത തുടരുകയാണ്.
മൊത്തവിപണിയിലെ വിലവർധന ചില്ലറ വിപണിയിലും പ്രതിഫലിക്കുന്നതോടെ ഉപഭോക്താക്കൾക്ക് കൂടുതൽ പണം ചെലവഴിക്കേണ്ടിവരും. ഇതര സംസ്ഥാനങ്ങളിലെ വിപണികളിൽനിന്നുള്ള സൂചനകൾ പ്രകാരം വരും മാസങ്ങളിലും വില കുറയാനുള്ള സാധ്യത വിരളമാണെന്നത് ആശങ്ക വർധിപ്പിക്കുന്നു.
