ആലുവ: ഗുരുതര രക്തരോഗം ബാധിച്ച രോഗിക്ക് രക്തമൂലകോശം ദാനം ചെയ്ത് മാതൃകയായി കെ.എം.ഇ.എ എൻജിനീയറിങ് കോളജിലെ രണ്ടാംവർഷ ഇലക്ട്രിക്കൽ ആൻഡ് ഇലക്ട്രോണിക്സ് എൻജിനീയറിങ് വിദ്യാർത്ഥി അദ്നാൻ പി. നസീഫ്. അപൂർവ ജനിതകപ്പൊരുത്തത്തിലൂടെ രോഗിക്ക് അനുയോജ്യനായ ദാതാവായി കണ്ടെത്തിയതിനെത്തുടർന്നാണ് അദ്നാൻ ദാനത്തിന് സന്നദ്ധനായത്.
2025 ഒക്ടോബർ 18ന് കോളജിലെ ദേശീയ സേവന പദ്ധതിയുടെ 226, 308 യൂണിറ്റുകളുടെ നേതൃത്വത്തിൽ ഡാട്രി രക്തമൂലകോശ ദാതാക്കളുടെ രജിസ്ട്രി സംഘടിപ്പിച്ച രജിസ്ട്രേഷൻ ക്യാമ്പിലാണ് അദ്നാൻ ദാതാവാകാൻ പേര് ചേർത്തത്. സാമ്പിൾ പരിശോധനയിലാണ് രോഗിയുമായി ജനിതകപ്പൊരുത്തമുണ്ടെന്ന് കണ്ടെത്തിയത്. അനുയോജ്യനായ ദാതാവിനെ കണ്ടെത്താനുള്ള സാധ്യത വളരെ കുറവായതിനാലാണ് ഇത്തരം പൊരുത്തത്തെ ‘ദശലക്ഷത്തിൽ ഒരാൾ’ എന്ന് വിശേഷിപ്പിക്കുന്നത്.
അദ്നാന്റെ സേവനത്തെ കോളജ് അധികൃതർ ആദരിച്ചു. പ്രിൻസിപ്പൽ ഡോ. അമർ നിഷാദ് ടി.എം., വൈസ് പ്രിൻസിപ്പൽ ഡോ. രേഖ ലക്ഷ്മണൻ, ഭരണകാര്യ ഓഫീസർ വീണ കെ. വിശ്വം, ദേശീയ സേവന പദ്ധതി പ്രോഗ്രാം ഓഫീസർമാർ എന്നിവർ സ്മരണിക നൽകി ആദരമർപ്പിച്ചു.
കൂടുതൽ യുവാക്കളും പൊതുജനങ്ങളും ഡാട്രി രക്തമൂലകോശ ദാതാക്കളുടെ രജിസ്ട്രിയിൽ പേര് ചേർക്കണമെന്ന് ദേശീയ സേവന പദ്ധതി യൂണിറ്റുകൾ ആഹ്വാനം ചെയ്തു. കൂടുതൽ പേർ ദാതാക്കളായി രജിസ്റ്റർ ചെയ്യുന്നത് രക്തരോഗികൾക്ക് അനുയോജ്യരായ ദാതാക്കളെ കണ്ടെത്താനുള്ള സാധ്യത വർധിപ്പിക്കും.
“ഒരു രജിസ്ട്രേഷനിലൂടെ ഒരു ജീവൻ രക്ഷിക്കാനാകുമെങ്കിൽ അതിലും വലിയ പുണ്യമെന്താണ്? ഞാൻ ചെയ്തു, നിങ്ങൾക്കും കഴിയും,” അദ്നാൻ പറഞ്ഞു.
