ആലുവ: വിജയദശമി ദിനത്തിൽ കുരുന്നുകൾക്ക് അറിവിന്റെ ആദ്യാക്ഷരം പകർന്ന് മുഖ്യമന്ത്രി വി.ഡി. സതീശൻ. പറവൂരിലെ എംഎൽഎ ഓഫീസിൽ നടന്ന വിദ്യാരംഭ ചടങ്ങിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നെത്തിയ 25-ഓളം കുട്ടികളെയാണ് മുഖ്യമന്ത്രി എഴുത്തിനിരുത്തിയത്.
പറവൂർ ദക്ഷിണ മൂകാംബികാ ക്ഷേത്രത്തിൽ ദർശനം നടത്തിയ ശേഷമാണ് മുഖ്യമന്ത്രി ഓഫീസിലെത്തി ചടങ്ങിൽ പങ്കെടുത്തത്. കുട്ടികളുടെ കൈപിടിച്ച് അരിയിൽ ‘ഹരിശ്രീ ഗണപതയേ നമഃ’ എന്ന് എഴുതിച്ച അദ്ദേഹം നാവിലും ആദ്യാക്ഷരം കുറിച്ചുനൽകി. എഴുത്തിനിരുത്തിയ കുരുന്നുകൾക്ക് മധുരവും വിതരണം ചെയ്തു.
മുൻ വർഷങ്ങളിൽ പ്രതിപക്ഷ നേതാവായിരിക്കെ നടത്തിയിരുന്ന വിദ്യാരംഭ ചടങ്ങ് ഇത്തവണ മുഖ്യമന്ത്രിയായ ശേഷവും അദ്ദേഹം തുടർന്നു. തിരക്കേറിയ ഔദ്യോഗിക ചുമതലകൾക്കിടയിലും കുരുന്നുകളോടൊപ്പം സമയം ചെലവഴിച്ച മുഖ്യമന്ത്രിയുടെ ചടങ്ങിൽ നിരവധി പേരാണ് പങ്കെടുത്തത്. കുട്ടികൾ ദക്ഷിണ നൽകിയാണ് വിദ്യാരംഭ ചടങ്ങിന്റെ ഭാഗമായത്.
